ನಮ್ಮ ಬಗ್ಗೆ

ಗುಬ್ಬಿಯಲ್ಲೆ ನೆಲೆ ನಿಂತ ಕರಿಗಿರಪ್ಪನವರ ವಂಶ ಈಗ ಸುಮಾರು ಏಳು ತಲೆಮಾರುಗಳ ವಂಶಾಭಿವೃದ್ಧಿಯನ್ನು ಕಂಡಿದೆ. ಈ ವಂಶಸ್ಥರೆಲ್ಲ ಇತರ ವಂಶದವರಂತೆಯೇ ಅನೇಕ ಕಷ್ಟ ಸುಖಗಳನ್ನು ಕಂಡ ವಂಶವಾಗಿದೆ. ಇಪ್ಪತ್ತನೆಯ ಶತಮಾನದ ಆದಿಭಾಗದಲ್ಲಿ ಹಬ್ಬಿದ ಇನ್ಫ್ಲುಎಂಜ಼ ಜ್ವರದಿಂದ ನಮ್ಮ ವಂಶದವರಲ್ಲಿಯೂ ಅನೇಕರು ಅಕಾಲ ಮರಣವನ್ನು ಹೊಂದಿದರು. ಅದು ನಮ್ಮ ವಂಶದವರಲ್ಲಿ ಅನೇಕರಿಗೆ ಬಹಳ ಕಷ್ಟಕರ ಸನ್ನಿವೇಶಗಳನ್ನು ತಂದೊಡ್ಡಿತು. ಆದರೆ ಕರಿಗಿರಪ್ಪನವರ ವಂಶಸ್ಥರು ಎಲ್ಲ ಕಷ್ಟಗಳನ್ನು ಎದುರಿಸಿ ನಿಂತು ಜೀವನದಲ್ಲಿ ಪ್ರಗತಿಯನ್ನು ಸಾಧಿಸಿದ್ದಾರೆ ಎನ್ನುವುದು ಬಹಳ ಸಂತೋಷದ ವಿಷಯ. ಅನೇಕರು ಸಮಾಜದ ಪ್ರತಿಷ್ಠಿತ ಹುದ್ದೆಗಳನ್ನು ಅಲಂಕರಿಸಿರುವ ಉದಾಹರಣೆಗಳಿವೆ. ಸಮಾಜಸೇವೆಗೆ ತೊಡಗಿಕೊಂಡಿರುವವವರು ಅನೇಕರಿದ್ದಾರೆ. ವಿವಿಧ ಬಗೆಯ ಪ್ರತಿಭೆಗಳು ನಮ್ಮ ವಂಶದವರಲ್ಲಿ ಕಂಡು ಬರುತ್ತದೆ.

ಆದರೆ ನಮ್ಮಲ್ಲಿ ಅನೇಕರಿಗೆ ಪರಸ್ಪರ ಪರಿಚಯವಿಲ್ಲ. ನಮ್ಮವರು ಎಂದು ತಿಳಿದಿಲ್ಲ. ವಂಶಸ್ಥರೆಲ್ಲರು ನಿಧಾನಕ್ಕೆ ದೂರ ಸರಿಯುತ್ತಿದ್ದಾರೆಯೋ ಎನ್ನುವ ಅನುಭವವಾಗುತ್ತಿದೆ. ಈ ನಿಟ್ಟಿನಲ್ಲಿ ನಾವೆಲ್ಲ ಒಗ್ಗೂಡಿ ಹೇಗೆ ಈ ಬಾಂಧವ್ಯವನ್ನು ಉಳಿಸಬೇಕು ಹಾಗೂ ಬೆಳಸಬೇಕು ಎಂಬ ಬಗ್ಗೆ ಚಿಂತನೆ / ಚರ್ಚೆ ನಡೆಸಬೇಕಾಗಿದೆ.

ಈ ಸಂಬಂಧ, ಮೂರು ವರ್ಷಕ್ಕೆ ಒಮ್ಮೆ ಈ ವಂಶದ ಸದಸ್ಯರೆಲ್ಲರು ದೇವರಾಯನದುರ್ಗದಲ್ಲಿ ಸೇರುತ್ತಾರೆ. ಈ ಕಾರ್ಯಕ್ರಮದಲ್ಲಿ ಎಲ್ಲರೂ ತಪ್ಪದೆ ಭಾಗವಹಿಸಬೇಕಾಗಿ ಕೋರಿಕೆ.

ಸಂಪರ್ಕ